خواطر عازب

على انغام – رجعنا في كلامنا ليه ؟ – انغام

اكتب لكم هذه البوست
🙂

وهذه البوست عبارة عن خواطر تجول في نفس شخص عازب زي اي عازب

بس مش زي اي عازب

عازب ليه اهداف .. عنده شوية طموحات كبيرة او صغيرة مش فارقة كتير

بس نفسه يبقى حاجة ، نفسه يسيب علامة .. بيحاول يفيد اكتر ما يستفيد ، بيدّي ومش مستني شكرا

نفسه ميبقاش جه الدنيا ومشي زي غيره معملش حاجة فاد بيها الناس وبلده

..

بس هيعمل دا ازاي وهو كل اما ينزل رمسيس او يمشي في شوارع بلده يجيله اكتئاب
!!

يرجع بيته ويقول انا ايه اللي خلاني امشي في البلد دي ؟؟

انا استحق حياة كريمة .. ليه بيحصلي كدا ؟؟

يرجع ويقول : ان شاء الله البلد ينصلح حالها وتبقى كويسة

بس اما بينزل تاني بيلاقي الحال بقى من سئ لــ اسوأ

الناس زي ما تقول بقت متعودة على الهمجية والفوضى وبيتعايشوا معاها

حتى الزحمة .. بقت شئ طبيعي
!!

يرجع البيت ويقول انا عايز اسافر واهج من البلد دي

بس يرجع في كلامه

ويقول : انا هسافر واصحابي واهلي وناسي كلهم هنا .. طب انا مبطلبش حاجات كبيرة يعني !! انا مش بمثل عبء على البلد

انا مش عايز اتجوز دلوقتي .. في حين ان دا من المطالب المشروعة لكل مواطن\ة  عازب\ة

انا مش عايز اشتغل مدير وﻻ رئيس بنك

انا عايز ابقى راجل محترم .. امشي في الشارع محترم محدش يضايقني ولا يرمي عليا زبالة

عايز ابقى انسان .. بني ادم وانا بركب المواصلات العامة .. مش لازم ابقى سوبرمان وانا في اﻻتوبيس

ولا سبيدرمان وانا ماشي في الشوارع ، علشان اتجنب الزبالة اللي على اﻻرض او اللي بتتحدف من فوق

عايز اعيش في بيئة نضيفة !! مش لازم اعمل جروب على الفيس بوك علشان ادعوا الناس انها ترمي زبالتها قدام مجلس المدينة او رئاسة الحي

علشان نجبرهم يشيلوا الزبالة اللي مرمية على اﻻرض في شارع المفروض انه كبير وعمومي
!!

عايز حد يدينا حلول

عايز حد يقولي متنزلش رمسيس !! .. طب وليه المركزية بتاعت القاهرة دي اصلا ؟؟

عايز حد يقولي مترميش زبالة في الشارع !! طيب اسيبها في البيت لغاية اما تعفن والجيران يفكروا ان عندنا ميت ؟؟

طب بالنسبة للستات اللي بترمي ميه او اكياس زبالة من البلكونات والشبابيك !! هنطلع نبوس ايد كل واحدة بترمي حاجة ؟؟

..

طب والعمل ؟؟ .. هنفضل مقضينها كدا ؟

لا

ﻻزم نتغير .. ﻻزم كل واحد فينا يقتل مبارك اللي جواه

اه بالمناسبة : حد نازل يوم الجمعة الجاية

9 – 9 – 2011

؟