مطلوب عروسة !

في قعدة مع واحد اعرفه قالي: يبني انت علشان تخرج من حالتك دي -حالة من اللامبالاة- لازم تدور على حد جديد ويا حبذئا -اللي هيا حبذا- لو تكون واحدة

وياريت تخطب بقى وتتجوز وتريحنا منك !!

مش عارف ليه عزوبيتي مضايقة الناس كلها حتى اللي مش اصحابي برضه متضايقين !! مش عارف هو انا مضايقهم في ايه يعني
وﻻ اكمنهم متغاظين اني عازب
😀

المهم

قولتله : طب انت عايزني يعني اعمل ايه ؟ امشي في الشارع واقول عروسة يا ناس لله ؟؟

..

طيب انا هدور على عروسة يا جماعة ، والمطالب بتاعتي بجد وحقيقي ، واما نشوف !!

مطلوب عروسة لواحد فيه المواصفات اﻻتية :

1- شاب زي الورد في ال 22 عاقل ورزين ومحترم وملوش في الهتش* وعمره ما عاكس بنات قبل كدا -ساعات كان بيتريق بس في سره- ومن عيلة كويسة ، ويشهد له بحسن السير والسلوك – وشعره احمر
😆

2- حاسوباتي* – مبرمج* – بيكره السجاير والشيشة وكل الحاجات المضرة بالصحة … يعني من اﻻخر مش بيصرف كتير وشقته خلصانة واعفاء من الجيش
🙂

3- طيب وعنده صبر ايوب ، بس على اد مهو طيب : في حاجات بتعصبه عصبية السنين ، لان اكتر 3 حاجات بيكرهم في حياته: حاجتين: الغباء والغباء

4- ثورجي* ومش منتمي لأي حزب -بس هو رئيس جمهورية نفسه- وبيحب بلده جداااااااا

5- بيحب القلش* واﻻفلام اللي فيها اكشن – زمان كان رومانسي بس ممكن يرجع تاني على ايد اللي هيحبها
🙂

6- بيحب اغاني عبدالحليم وام كلثوم وعبدالوهاب والزمن الجميل .. دلوقتي بيسمع حمزة نمرة وماهر زين وساعات عمرو دياب القديم وبـــــس

7- اكتر حاجة تضايقه: انه يلاقي حد بيحقر منه او بيحقر من الحاجات اللي هو مهتم بيها او من شغله

8- واضح وصريح وملوش في الف والدوران

كفاية كدا دلوقتي

..

هيا بقى يكون فيها المواصفات اﻻتية :

1- عاقلة وبتسمع الكلام …. لان انا عندي الضغط والسكر ومش ناقص وجع قلب

2- قارية الكتاب الاخضر *

3- متكونش اخر احلامها انها تتجوز وتجيب عيال .. وفي نفس الوقت متقتلش احلامي لمجرد اني اتجوزتها وجبت عيل منها ، ومتخلينيش اكره الجواز وسنينه

4- متكونش بتحب فيلم تيمور وشفيقة

5- وجه بحري .. ويا حبذئا لو نبعد عن خط المنصورة دمياط
ياريت تكون اسكندرانية – علشان السفر والبهدلة بس
😆

6- تكون بتحب الضحك والفرفشة -بس مش طول الوقت طبعا يعني- ومتقلبليش البيت نكد وغم

7- متكونش ذنانة* – علشان انا مبحبش الذن على الودان ، لاني بكره الدبان مووت

7- طبعا مش هقول حاسوباتية -مع انها لو حاسوباتية فهتوفر عليا كتير اني افهمها انا عايز ايه – بس تكون خريجة|طالبة كلية كويسة ، وتكون بتفهم

8- بتعرف تعمل محشي ، ولو مبتعرفش فهتقعد مع امي ايام الخطوبة تتعلم ومبتحبش السمك المشوي وياريت تكون بتعرف تقشر السمك من غير ما تسيب فيه شوك
😀

9- بتعرف تلعب بلاي ستيشن – ولو مبتعرفش تقعد تتعلم لحد الجواز
😆

كفاية كدا مؤقتا 🙂

10- اخر واول حاجة :
عن أبي هريرة رضي الله عنه: قال النبي صلى الله عليه وسلم: “تنكح المرأة لأربع لمالها ولحسبها ولجمالها ولدينها فاظفر بذات الدين تربت يداك”

..

انا خلصت !! .. والمطالب بتاعتي دي لن اتنازل عنها ابدااااااااااا

في النهاية عايز اقول حاجة:

لو انت/انتي شايف انك مينفعش تتغير علشان اللي بتحبه ، فإسمحلي اقولك انك غلطان
هو انت لو مكنتش تتغير علشان اللي بتحبه وبيحبك .. هتتغير علشان مين ؟؟ وهتعمله ايه تعوضه بيه لو متغيرتش علشانه ؟؟

اند فروم ماي ﻻب توب اي كان ساي ذات : اي كان تشانج فور ذا جيرل ذات ويل بي ذا ومان اوف ماي لايف .. اند اي كان دو مور
and From my lab-top, I can say that : I can change for the girl that will be the woman of my life and i can do more
🙂

بالنسبة لطرق التواصل فهي كتيرة والحمد لله

——————-
معاني المفردات والتراكيب والكلام الغريب اللي سمعتوه :

– الهتش : وهو الكلام اللي ما منوش فايدة

  • الحاسوباتي : وهو خريج كلية الحاسبات والمعلومات – وانا خريج 2010 جامعة المنصورة
  • المبرمج : هو كائن ليلي يعيش على كوباية النسكافيه او العصير او ميراندا تفاح ، دايما معاه لابه والهاند فري وسلك النت ، ويعرف يقعد في اي مكان في الشقة بالحاجات دي
  • ثورجي : هو مصطلح ظهر مؤخرا يوصف بيه الشخص اللي بينزل ميدان التحرير”مش مصطفى محمود وﻻ روكسي” وبتاع اعتصامات واضرابات ، وعيش حرية عدالة اجتماعية
  • القلش : يعني القلش .. ملهاش تعريف دي .. قلش – يقلش – الحاحا

😀

  • الكتاب اﻻخضر: هو كتاب الرجال من المريخ والنساء من الزهرة ، وكنا اتكلمنا عنه قبل كدا في البوست دي
  • ذنانة : والست الذنانة هيا اللي بيبقى عندها طلب وعارفة انه هيترفض وتقعد تتحايل على الراجل علشان ينفذهولها ، ودي بتبقى عاملة زي الدبانة الرخمة اللي بفضل تزن جمب ودانك