happy “occupation” day

من كام سنة كده كانت بداية معرفتي باليوم اللي اسمه “valentines day” (أوعى تفهمني غلط )

ما عرفتوش معرفة شخصية يعني .. بس ده كان أول يوم يصادف اني أنزل من البيت في الوقت ده من السنة .. ماكانش فيه سبب أصلا يخليني أنزل من البيت في اليوم ده

أو يمكن كنت بنزل بس كعادتي مكنتش بحاول أشوف ايه اللي بيحصل حواليا

لحد ما جه اليوم ده .. عملت انجاز يعادل اختراع توماس اديسون للمصباح و اكتشاف الترسانة لأبوتريكة كلاعب شاب و إسقاط المصريين لحكم العسكر ( باعتبار ما سيكون طبعا )

كان الإنجاز اني نزلت الشارع و بصيت حوليا ( الاثنين مع بعض )

و “عليا الطلاج بالتلاتة اتخضيت”

لاقيت دب كبييير لونه أحمر و شايل شحط كبير يعمل مني 3 (ده اللي فهمته في الأول )

طيب الدبدوب شايل الشحط ده و رايح بيه فين

وقف تاكسي ( بصراحة مش عارف مين اللي وقف التاكسي ) بس على حد علمي الدبدوب مش بيعرف يتكلم عربي .. و مشي التاكسي بيهم .. بس الغريب ازاي تاكسي يقف لدب .. و أحمر كمان ؟؟!

المهم ان دي ماكانتش الخضة الوحيدة .. لقيت نفس الدبدوب ده كتييير و برضه كائن يشبه البشر معاه و حد فيهم شايل التاني

و للأسف قعدت أفكر شوية قبل ما أسأل أي حد .. هو مصر سابها الاحتلال الانجليزي و الاسرائيلي علشان الدببة تحتلها ؟

ثانيا .. ايه الأسلحة اللي ممكن يستخدمها الدببة علشان يحتلوا مصر ؟

ثالثا .. هو فيه دب لونه أحمر ؟

رابعا .. ليه أحمر بس ؟ .. يعني ليه مش أسود مثلا ؟ .. أو أبيض شبه الدب القطبي ؟؟

و اكتشفت اني كان ممكن أوفر كل الأسئلة دي لو كنت سألت أي حد قبل ما أسأل نفسي

علشان كانت الإجابة ان النهارده“valentines day”

هو ده بقى اللي بيقولوا عليه ؟ .. كل ده بيحصل في اليوم ده و أنا معرفش ؟ .. و هو علشان الناس تحتفل باليوم ده تبيع البلد بالبساطة دي و لشوية دببة ؟ .. فين الوطنية اللي عند الناس ؟؟ .. خليهم بقى يستغلوكوا لحد ما في الأخر هيعملوا دولة و نضطر نصدرلهم غاز هما كمان

المهم .. الإستفادة الوحيدة اللي طلعت بيها من اليوم ده اني ماينفعش أخرج تاني في الوقت ده من السنة .. الدببة بتبقى عاملة زحمة أوي .. الشوارع واقفة .. التاكسيات مافيهاش مكان .. عدد سكان مصر بيزيد بنسبة 30% تقريبا ( اذا افترضنا ان البني أدمين سكان زيهم زي الدببة ) ..

بس أنا عندي سؤال صغير .. ماينفعش اليوم ده يتقسم على أكتر من يوم بحيث مايبقاش فيه زحمة في اليوم ده ؟ .. ولا الحبيبة هيتهموني اني بتبع مخطط خارجي لتقسيم الفالانتين ؟

على العموم أنا برضه مش هنزل بكره علشان الزحمة إلا في حالة ان الدببة دي يكون مكتوب عليها

يسقط حكم العسكر

 ساعتها هقتنع ان احتلال الدببة ده ممكن ييجي بفايدة ..