أيون ..حيران 

ممكن أكون مختلف شوية ..عن بقية أقرانى من العُزاب … فى وجهه نظرى عن العزوبيه .. وشايف انها مرحلة أنتقالية ممتعة فى بعض لحظاتها ولكنها محيره فى معظم فتراتها
مع الاعتراف ان الزواج مش هو النهاية السعيدة دايما ولكنه شر لابد منه
🙂

ومن هنا جه أسم اليوسر بتاعى  .. عازب حيران  .. ليه بقى حيران ؟؟

حيران لانى مش عارف أحدد هل فعلا سعادتى فى الزواج؟؟ .. ولا هتكون مراتى .. هى سبب حزنى وهمى وتكون هى القشة اللى هتقسم ظهرى ؟؟
سامع واحد بيقولى .. يا عم بس أستنى الله يكرمك ..يعنى أنت خلصت كل حاجة للجواز ..وناقصك العروسة ؟؟؟  … أرد وأقولك  .. ماهو ده سبب أكبر االلى يخلينى أحتار أكبر .إزاى بقى ؟؟
يعنى أنا يطلع عينى لغاية مجيب شقة وبعدين أجهزها علشان فى الاخر ..أجيب واحدة تنكد عليا عيشتى ؟؟ طب ده كلام ناس عاقلين ؟؟
فعلشان كدا قررت أنى أتفرج على حياه المرتبطين من بعيد وأراقبها ..واشوف أيه الحلو اللى فيها وأعمله وايه اللى وحش واحاول أتجنبه
وده هيبقى موضوع الحلقات اللى جايه .. حلقة ممكن تبقى كوميدية وممكن تبقى درامية ..هاجى ..واحكيهالكم ..واشوف رأيكم فيها ؟؟

هطير انا بقى . أروح أجيب أول حكاية !! !.. يالا بينا