صوت العُزاب

Recent Updates RSS Toggle Comment Threads | Keyboard Shortcuts

• 

  تراراام 12:14 pm on May 16, 2012 Permalink | Reply  

  قميص نفيسة نشف؟…. لا لسه منشفش ! :-/ 

  من باب خبرتى الطويلة”او القصيرة ” فى حياة العزوبية… “مع انى عايشة مع اهلى و الله – الا اننا فى البيت بنطبق نظام الاكتفاء الذاتى والاعتماد على النفس “

  ام هند …

  فى كتير اوقات بيجيلك مناسبة ما فجأة و تيجى تحضر هدومك تلاقيها عايزة تتغسل و ميكونش فيه وقت خالص لانك تغسلهم
  لانك حتى لو غسلتهم مش هيلحقوا ينشفوا

  فى الحاله دى… فيه خطة سريعة و عمليه ممكن تاخد حوالى 30 دقيقة

  بعد ما تغسل الهدوم سواء بأيدك او فى الغسالة ايهم كان اسرع

  1- اعصرهم كويس جدا
  او حطهم فى مجفف الغسالة على اعلى درجة او اطول مدة على حسب الغسالة
  2- جيب فوطة كبيرة و افرد الهدوم عليها وبعدين لفهم زى ToDo
  جوة بعض و اعصرهم كويس جدا
  3- بعد كدة خد الهدوم واكويهم عادى و البسهم

  و بالهنا والشفا

  ملاحظة هامة ” طريقة احمد حلمى فى فيلم ظرف طارق فى انك تحط الهدوم فى الفرن … فعليا فاشلة جدا
  و فيه احتمال كبير تحرق الهدوم على حسب نوع القماش … او الازرار تسيح “

  و أبقوا ادعولى…
  يلا سلام

  Tweet
   

  Reply Cancel reply

  Required fields are marked *

  Name *

  Email *

  Website

  

• 

  admin 4:11 pm on April 25, 2012 Permalink | Reply
  Tags: Egypt ( 2 ), حب ( 3 ), عازب ( 9 )   

  في عيدها قررت اخطبها 

  ازيكم يا عزاب

  اقر انا اسلام ضياء .. اني غيرت الحاة اﻻجتماعية بتاعتي من عازب .. الى خاطب

  هذا والله الموفق وربنا يستر ومنفسخش الخطوبة قريب

  …

  قصة حب

  كنت بحبها من زمااااااان ، وكنت مخبي على كل الناس ومكنتش عايز اقول لحد
  علشان خايف على مشاعرها وخايف حد يحسد حبنا

  هيا اشتريتلي امبارح دبلة الخطوبة وانا للاسف مكنش معايا حاجة اعوضها بيها غير اني اعترف بحبنا
  قدام الناس كلها

  والنهاردة قدام كل الناس اعلن ان رغم كل البهدلة اللي شوفتها ولسه بشوفها ، وبرغم كل الاهانات ورغم كل حاجة

  فانا بعترف النهاردة قدام الناس كلها اني بحبها

  …

  

  ..

  كل سنة وانتي طيبة يا حبيبتي ، وان شاء الله انا وراكي لحد ما اشوفك احلى بلد في الدنيا

  كلمة لحبيبتي : ارجوكي متحاوليش تبهدلي فيا كتير .. علشان انتي عارفه ان خلقي ضيق وبزعل بسرعة

  Tweet
   
• 

  Mohamed Refai 1:11 am on April 20, 2012 Permalink | Reply  

  شيخ فلتان 

  عنوان شخصيتى طول فترة الدراسة “شيخ فلتان” واللى معناها واحد كان بيحافظ على شوية مفاهيم
  بتقوله انت ماينفعش تصاحب بنت الا لو كان فيه ارتباط جاد من اى نوع، لكن بيبقى جواك صوت
  تانى هتعيش شبابك امتى يا “موكوس” ؟ ويقاطعه الشيخ “عايز تعيش صيص … يا واد يامؤمـن! ”
  فى ساعتها على طول بتحس ان شبح خالد عبد الله فـ ديلك فترمى كل الأفكار دى
  وتقول: لا بكل قوتك .. انا لا ده ولا ده انا بنى آدم لاهو عايز يعيش بتزمت ولا عايز يعيش تلفان
  ، و بمجرد ماتخلص الجامعه، واذا كنت زى حالاتى كدهشيخ من غير زبيبة، فلتان من غير سوابق.
  بتقف مع نفسك وقفة قصيرة أوى فى كلامها وطويله فى تنفيذ خطتها

  أنا بيكلمنى
  ايه ياباشا الجيش وخلصت منه
  الكلية ويارايح قول للجاى الأفندى بقى خريج
  العشرين وبدأت الأزح من عليها
  الشغل ياميسر يسر
  ناوى على ايه فى حياتك هتفضل فرد أعزل كده، مش ناوى تتلافى سلاح وتعد الجثث زى هنيدى !!

  الشيخ بيرد
  اسمع ياسيدى انت ان شاء الله تشتغل بس وتثبت فى مكان كويس
  بعد كده ربنا ييسر وتلاقى بنت الحلال

  وبدأت الخناقه
  يابيه منا كنت بقولك طول السنين اللى فاتت وانت حجر مابتفهمش

  بهدوء مولانا يرد
  ما اللى حصل حصل بقى ياسيدنا، وبعدين ربنا هييسر وطالما الحته الشمال دى بيضا كله هيبقى فُل

  بدأ يتعفرت
  وحياتك انت لهتتدبس فى واحده نظام صالونات وهتشوف ايام اسود من قرن الخروب وبكره تقول انا اللى جبت ده كله لنفسى

  قلع الجبه والقفطان وبدأ يأرنب
  طب انصحنى ياعم وبعدين ؟

  ارتاح اكتر فى قعدته بعد ما الشيخ رضخ
  انت جايلى دلوقتى وعايز نصيحة ! هو بعد ماشاب ودوه الديسكو ؟

  وشه احمر وعرقه بقى مرقه
  امال بتجادلنى ليه! بص بقى انا ماعتمدش عليك طول السنين اللى فاتت دى وعلى طول بديلك على دماغك
  ،، نشف عرقه وهندم نفسه وكمل اللى بدأه
  ثم انا اللى خلانى “صابر” كل ده يخلينى أصبر كمان شوية مش هيضر ولكل مجتهد نصيب و فى التأنى السلامه وفى العجلة الندامة وكل الكلام اللى كنت بقراه فى ارشادات كتاب المدرسة
  وبعدين يعنى اللى اتهببوا خدوا ايه، خلينا شوية فى المساحة الواسعه دى من الحرية، وعيش يومك بشوية التزمات صغيره وسهله فى تنفيذها خلصها ومع الوقت هتلاقى كل حاجه فى أوانها _ان شاء الله_ #يقين

  <–! كل اللى فات ده من الجايز جداً انه يكون تكرار  للحوار اللى دار جواك انت كمان، الفكره مش انك تتلهف على التزمات جديده انت مش أدها، الفكره انك تبقى اد التزماتك الحالية الأول وبعدين تبقى تدور على غيرها أكبر !–>

  Tweet
   
• 

  admin 1:47 am on March 20, 2012 Permalink | Reply
  Tags: تهييس   

  ابراهيم وسهير 

  ..

  ابراهيم : انا حبيتك انتي يا سهير حبيت سهير الانسانه مش سهير الفنانة !

  سهير : سهير الانسانه هيا سهير الفنانة .. انا مقدرش افصل شخصيتي عن نفسي ، انا دفعت حياتي وشبابي علشان اوصل للمجد دا ، مقدرش اضحي بكفاح عمر بحاله علشان … واحد كومبارس

  ابراهيم :  كومبارس ! انتي اللي بتقولي كدا ؟؟

  سهير : فوق لنفسك يا ابراهيم ، في فرق كبير اووي بيني وبينك .. يا ابراهيم انت كنت وسيلة من وسائل الدعايا ، كل اللي قريته في الجرايد والمجلات واللي الناس رددوه كان دعايا لروايتي الجديدة

  ابراهيم : يعني كنتي بتخدعيني الوقت دا كله ؟ بتمثلي عليا ؟ تقربيني منك وفي الوقت نفسه نازله فيا طعنات ؟ تقوليلي انت اغلى حاجة عندي في الدنيا وانا وسيلة رخيصة للدعايا
  مش معقول مش معقول ابدا تكوني فنانة

  سهير : احفظ ادبك يا ابراهيم .. احنا قضينا ايام جميلة ، ولازم تنتهي نهاية جميلة

  ابراهيم : طبعا زي نهاية الروايات اللي بتمثليها .. مش كدا ؟ تتطعني عشيقك بالخنجر في ضهره والستارة تنزل ، تمثيلية عظيمة من تمثيل النجمة الكبيرة
  ليه تعملي فيا كدا ؟؟ ليه تجيبي واحد كومبارس وتديله دور البطولة في رواية وهمية .. بقالك 3 اشهر بتمثلي عليا … غشاشة

  سهير : تسمح تخرج بقى يا استاذ ابراهيم ؟

  ابراهيم : طبعا لان دوري خلص ، والستارة لازم تنزل  .. سقفوا يا بهاوات سقفوا … استنى انت وهو .. يا سهير هانم قبل ما اخرج لازم تعرفي ان لسه بدري اووي على ما الستارة تنزل ..
  وحياتك يا سهير .. وحياة الحب اللي حبتهولك .. وحياة كل كلمة حلوة قولتهالك .. لازم تندمي .. لااااازم !

  Tweet
   
• 

  admin 12:52 am on March 8, 2012 Permalink | Reply
  Tags: البنات, الجيش, الشباب, حب ( 3 ), عادات   

  هي عادة ولا هنشتريها ! 

  بكرة ان شاء الله شبكة واحد قريبي

  شاب زي كل الشباب المحترم ، دخل الجامعة ، كلية محترمة جدا ، وحب بنت كويسة جداا

  مرت الايام والسنين وهما متفقين على اخر سنة هيتقدملها ويخطبها

  اهله عارضوا شوية الفكرة في اﻻول بس في اﻻخر وافقوا

  خلاص اخر سنة عدت والمفروض يتقدملها … لكن … وعلى غير المتوقع … بس زي كل الشباب

  دخل الجيش سنة .. عسكري

  و …

  لما طلع من الجيش اكتشف انها اتخطبت !

  بس .. “وكعادة اي شاب بعد المواقف اللي زي دي” اهله راحوا خطبوله واحدة قريبته من العيلة

  وهيسافر بره البلد علشان يشتغل ويجيب فلوس

  وبعدين يرجع يعمل فرح ويتجوزها ويسافر تاني !!

  …

  .

  و … و بس ! …. خلصت الحدوته … حلوه ولا منتوته ؟؟

  ايه البواخة دي يا عم ؟؟ طب محنا عارفين .. البنات طول عمرها كدا ، والشباب برضه نصيبهم كدا

  هيا عادة  وﻻ هنشتريها !؟

  Tweet

  admin and Miss S. are discussing. Toggle Comments

   
  • 

    Miss S. 4:09 am on March 8, 2012 Permalink | Reply

    ليه التعميم؟؟!
    البنات مش دايما شياطين ولا الشباب دايما مغلوبين علي امرهم

  • 

    admin 1:21 am on March 20, 2012 Permalink | Reply

    محدش عمم وقال ان البنات كلها شياطين بس قولت ان الحكايات تلت ارباعها -ان مكنش كلها- بتنتهي بكدا !
    ودا جاي من واقع ومبقولش تأليفات
    والمفروض ان كلنا نستفاد من الدرس دا – انا مش حاطه هنا علشان اتريق ولا علشان اي حاجة تانية غير اننا نستفاد من الحتة دي

    والذكي هو اللي يستفاد وميغلطش !

• 

  admin 6:04 am on February 14, 2012 Permalink | Reply
  Tags: Valentine Day, حب ( 3 ), خواطر ( 2 ), عازب ( 9 )   

  Happy f***** Valentine Day ! 

  عزيزي العازب/ ة

  صباح الخير او مساء الخير على حسب الوقت اللي انت بتقرا فيه البوست دي

  كل الناس -البني ادمين يعني- عندهم حاجة

   زي البطيخة كدا طالعالهم فوق كتافهم ، حاجة كدا زي البطاطساية

  اﻻسم العلمي ليها : الدماااااغ

  والدماغ دي في منها انواع  كتير .. لكن الدماغ اللي هتكلم عنها النهاردة هيا الدماغ النضيفة

  وسبحان الله الدماغ النضيفة نادر اما بتلاقيها مع انها المفروض انها نضيفة وكلنا بنتولد دماغنا نضيفة

  بس للاسف اﻻنسان بغباوته هو اللي بيحب يخليها مش نضيفه .. او يمكن بيزعل انه مش بيكون زي بقيت الكائنات اللي بتمشي على رجليها بس عندها بطاطساية

  مع ان في ناس دماغها نضيفة برضه

  المهم خلال قرائتي لقلش العزاب النهاردة على موضوع الزالنتين دا ، واللي ممكن تتابعوه من خلال الهاش تاج الرسمي للعزاب على تويتر

  #3ozzab

  المهم في كام تويتاية عجبوني كدا لناس دماغها نضيفه ، وحبيت انقلهالكم هنا بما ان دماغنا نضيفة زي بعضينا يعني

  …

  @5aledsultan : ال ( Single ) هو شخص عجز العالم عن فهم قلبه ففضل أن يكمل حياته مع نفسه . . . ‎#valentine‏ ‎#3ozzab‏

  ‎#3ozzab‏ RT ‎@Elbernameg ‏: لو معكش فلوس لهدية الفالنتين زيى _ =__أعمل نفسك سنجل Sorry V̶a̶l̶e̶n̶t̶i̶n̶e̶ D̶a̶y̶ .. ! I’m single

  @esl4mdiaa : يعني ايه فالنتين يا كبير ؟ – ‎http://www.youtube.com/watch?v=o3uL91vEJtE‏ — looool ‎#3ozzab‏ ‎#valentine‏

  ‎#3ozzab‏ LIKE ‎:D‏ RT ‎@Elbernameg‏: لو انت سنجل اخبط لايكلو مرتبط ضرب كومنت عررفنا فيه ايه اللى رماك ع المر ‎:)‏)

  RT ‎@Elbernameg‏: انـا هنـزل بكرة اشتريلى هدية و انـزل مع نفسـى افسحنـى ‎:D‏…عشان انــا بـــحـبـنـى<3 .. مين معايا ‎:)‏. ‎http://fb.me/1o0uOXrz9‏

  ‎#3ozzab‏ RT ‎@larrynabil ‏: أرفع راسك فوووووووووق أنت سينجل ‎:D‏ ‎#SingleParty‏

  …

  واﻻن …. مع القلشة اللي اخدت المركز اﻻول معانا النهاردة

  ‎#fb ‏ اجمد قلشة ‎:D‏ RT ‎@AAltameem‏: الفرق بين عيد الاضحى وعيد الحب/هو انه في الاول تدفع الاموال للخروف بينما في الثاني يدفع الخروف ‎#valentine

  …

  نصيحة للناس اللي بتحب بجد:  الحب مش يوم واحد ، وعيد الحب بيبقى في كل لحظة تحس فيها “بالنعمة اللي اسمها الحب” تجاه الشخص اللي انت بتحبه

  

  Tweet
   
• 

  ahmedeleven 4:44 am on February 14, 2012 Permalink | Reply  

  happy “occupation” day 

  من كام سنة كده كانت بداية معرفتي باليوم اللي اسمه “valentines day” (أوعى تفهمني غلط )

  ما عرفتوش معرفة شخصية يعني .. بس ده كان أول يوم يصادف اني أنزل من البيت في الوقت ده من السنة .. ماكانش فيه سبب أصلا يخليني أنزل من البيت في اليوم ده

  أو يمكن كنت بنزل بس كعادتي مكنتش بحاول أشوف ايه اللي بيحصل حواليا

  لحد ما جه اليوم ده .. عملت انجاز يعادل اختراع توماس اديسون للمصباح و اكتشاف الترسانة لأبوتريكة كلاعب شاب و إسقاط المصريين لحكم العسكر ( باعتبار ما سيكون طبعا )

  كان الإنجاز اني نزلت الشارع و بصيت حوليا ( الاثنين مع بعض )

  و “عليا الطلاج بالتلاتة اتخضيت”

  لاقيت دب كبييير لونه أحمر و شايل شحط كبير يعمل مني 3 (ده اللي فهمته في الأول )

  طيب الدبدوب شايل الشحط ده و رايح بيه فين

  وقف تاكسي ( بصراحة مش عارف مين اللي وقف التاكسي ) بس على حد علمي الدبدوب مش بيعرف يتكلم عربي .. و مشي التاكسي بيهم .. بس الغريب ازاي تاكسي يقف لدب .. و أحمر كمان ؟؟!

  المهم ان دي ماكانتش الخضة الوحيدة .. لقيت نفس الدبدوب ده كتييير و برضه كائن يشبه البشر معاه و حد فيهم شايل التاني

  و للأسف قعدت أفكر شوية قبل ما أسأل أي حد .. هو مصر سابها الاحتلال الانجليزي و الاسرائيلي علشان الدببة تحتلها ؟

  ثانيا .. ايه الأسلحة اللي ممكن يستخدمها الدببة علشان يحتلوا مصر ؟

  ثالثا .. هو فيه دب لونه أحمر ؟

  رابعا .. ليه أحمر بس ؟ .. يعني ليه مش أسود مثلا ؟ .. أو أبيض شبه الدب القطبي ؟؟

  و اكتشفت اني كان ممكن أوفر كل الأسئلة دي لو كنت سألت أي حد قبل ما أسأل نفسي

  علشان كانت الإجابة ان النهارده“valentines day”

  هو ده بقى اللي بيقولوا عليه ؟ .. كل ده بيحصل في اليوم ده و أنا معرفش ؟ .. و هو علشان الناس تحتفل باليوم ده تبيع البلد بالبساطة دي و لشوية دببة ؟ .. فين الوطنية اللي عند الناس ؟؟ .. خليهم بقى يستغلوكوا لحد ما في الأخر هيعملوا دولة و نضطر نصدرلهم غاز هما كمان

  المهم .. الإستفادة الوحيدة اللي طلعت بيها من اليوم ده اني ماينفعش أخرج تاني في الوقت ده من السنة .. الدببة بتبقى عاملة زحمة أوي .. الشوارع واقفة .. التاكسيات مافيهاش مكان .. عدد سكان مصر بيزيد بنسبة 30% تقريبا ( اذا افترضنا ان البني أدمين سكان زيهم زي الدببة ) ..

  بس أنا عندي سؤال صغير .. ماينفعش اليوم ده يتقسم على أكتر من يوم بحيث مايبقاش فيه زحمة في اليوم ده ؟ .. ولا الحبيبة هيتهموني اني بتبع مخطط خارجي لتقسيم الفالانتين ؟

  على العموم أنا برضه مش هنزل بكره علشان الزحمة إلا في حالة ان الدببة دي يكون مكتوب عليها

  “يسقط حكم العسكر“

   ساعتها هقتنع ان احتلال الدببة ده ممكن ييجي بفايدة ..

  Tweet

  Tamer and esl4m are discussing. Toggle Comments

   
  • 

    esl4m 4:55 am on February 14, 2012 Permalink | Reply

    ههههههههههههههههههههههههههههههههههههههه
    بوست جااااااااااااامدة جدااااااااا
    حلوة فكرة الدبدوب اللي مكتوب عليه يسقط يسقط حكم العسكر دا .. الحق اعمل عليه حقوق ملكية احسن الصين ينزلوه قبلك

  • 

    Tamer 12:23 am on February 15, 2012 Permalink | Reply

    دبدوب أسود … الله يسد نفسك ..كرهتنى فى الدباديب …. أبقى الدبدوب الاسود ده لخطيبتك خليها … تخلى الدبدوب يقعد عليك يفطسك

• 

  anonymousaia 3:00 am on February 14, 2012 Permalink | Reply  

  14-2 

  يا تري انا اللي غريبه عشان بستهيف الناس اللي بتحتفل باليوم ده ولا هما اللي مش طبيعين و مزودنها كده و مأفورين؟؟
  و هل يا تري برضه لو انا اللي غريبه يكون ده سببه ان الواحد عازب ولسه مجربش انه يكون مهتم بحد ولا عشان انا اصلا مش متخيله نفسي وانا باقول لحد “Happy Valentine’s Day Ya Baby” لأني للاسف اتعودت اتريق علي الناس دي :$
  طيب انا ليه بتريق عليهم؟؟ يا تري عشان مش زيهم و “happily in love” و حقد بقي و نفسنه بنات ؟

  كلا البته!

  بس مش مقنع ابدا انهم يغرقولنا ال “social media” بمظاهر احتفالهم ده عشان يورولنا قد ايه هما سعداء, ماشي يا جماعه ربنا يهنيكوا والله و يكتبلكوا كل خير بس الهي ربنا يكرمكوا بلاش الجو الملزق ده مش لازم تعرفوا الناس انتوا قد ايه طايرين فوق الغمام الوردي اليوم ده !

  و لأني قرفت من اليوم ده بسبب الناس الملزقه اللي بتحتفل بيه فأنا اعلن انه في حال تنازلي عن منصب العازبه الاكبر لأي سبب من الاسباب فأنا ملتزمه بعدم الاحتفال بهذا اليوم الملزق برضه لأني مقتنعه ان الحب اكبر من كلمه بتتقال في يوم زي ده…متبقاش عادي زي كل الناس وتحتفل باللي بتحبه في اليوم ده..احتفل باللي بتحبه كل يوم لأن دي نعمه من ربنا عليك انك لقيته
  و العزاب حلوين برضه هه

  Tweet

  Nouran and esl4m are discussing. Toggle Comments

   
  • 

    esl4m 4:05 am on February 14, 2012 Permalink | Reply

    looooool
    viva 3ozzab

  • 

    Nouran 4:59 am on February 14, 2012 Permalink | Reply

    على فكره .. لو خدت بالك هتلاقى ان اللى مغرقين ال social media هم ال singlez ^_^ .. يعنى .. بيصبروا نفسهم .. بإعتبار ما سيكون )

• 

  Sultan 2:23 am on February 14, 2012 Permalink | Reply  

  أحمر على أبويا بطيخ 

  

  مزيكا هادية … نور خافت … هات اللاب توب على رجلك … دووس يا معلم

  معاكم أحمد سلطان من عزاب بكلمكم دلوقتى من شقتنا فى الدور التالت فى اليوم الأكثر حمارا فى السنة

  أربعتاشر فبراير … يوم الفلانتين زى ما هتسمع اسمه من توتو وسوسو ولولو

  أو يوم الثلاثـــــــــــاء زى ما هتسمع اسمه من أى عـــــــــــــــــــازب

  ! شايف ملايين من العزاب واقفين أودامى منتظرين الحلقة دى وكلهم أمل أحب أقولكم انســــــــــوا … مفيش فايدة

  بدأت توصلنا الاس ام اسس وكلهم بيسألوا يعملوا ايه فى اليوم دا ؟

  فى الواقع تخالفت الآراء فى هذا الموضوع فمنهم من قال عليك بالجلوس فى المنزل طوال اليوم ولا تغادره الا فى حالة اندلاع حريق

  ومنهم من قال عليك بالجلوس فى البلكونة مرتين قبل الغداء ومرة أخيرة قبل النوم مباشرة وتبعد كل البعد عن اللون الأحمر وما شابهه

  ولا مانع من سماع بعض المقطوعات الهادفة مثل : المولد مراجيح وذلك لصرف انتباهك عن المحرمات

  هذا والله أعلم وأدى دقنى أهـــــــــــــــى لو فى حد بصلك ولا حتى قردة شمبانزى بتلات رجول

  Tweet

  esl4m is discussing. Toggle Comments

   
  • 

    esl4m 2:38 am on February 14, 2012 Permalink | Reply

    looooooooooooool
    Nice post

• 

  admin 4:15 pm on January 12, 2012 Permalink | Reply
  Tags: dairy, facebook, single, جب, عازب ( 9 ), يوميات   

  رأس السنة الهجرية اللي فاتت.. كل سنة وإنتوا طيبيين الناس .. اليوم في الشغل كان ظريف مكنش في مشاكل كتير يعني بس كل شيء إبتدى في آخر يوم العمل ..

  الساعة ٨ مساءآ بعد يوم شغل طويل بستعد فيه لإني أروح  فتحت الـFacebook قلت أبص على الدنيا وأبص على إصحابي…
  وفعلا فتحت وكام كومنت على كام لايك وفجأة إزبهليت ..  أيوه هي .. شفتها معاه في فستان فرح والسعادة بتبظ من عنيها وعنيه ..

  (More …)

  Tweet