عازب علي مائدة افطار عائلية في رمضان
السلام عليكم و رحمة الله 🙂
اتمني يكون كل العزاب بخير في رمضان و مستمتعين, طبعا احنا في ثاني اسبوع في الشهر الكريم و الكل شارك في العزومات العائلية اللي بيتجمع فيها كل افراد العيلة و الاسر الصغيرة في العيلة, بيكون يوم جميل ولو انت كمان العازب الوحيد في اليوم دة بيبقي اليوم اجمل و اجمل.
علي الفطار و المدفع ضرب و تربيزة الاكل مزحومة بالناس ولا ميكروباس تخيل معايا 6 اسر علي تربيزة واحدة, و تلاقي بقي الازواج الجدد اعدين ياكلوا بعض و كل زوجة بتطلع لجوزها في الطبق بتاعة و هوا بياكلها و انت كعازب اعد محدش واخد بالو منك اصلا غير ربنا يكرمها الست الوالدة, بتبقي ميزة تعد تاكل انت ولا القطر ولا فارق معاك حد تاني محدش مركز اصلا.
وبعد ما شوية وقت يعدوا علي الاكل يبداء الكلام بقي و الهزار و كل اتنين متجوزين يغلسوا علي اتنين تنين لحد ما يجي عليك الدور يا باشا -اوبا- و تتهبد السؤال المعهود “اية بقي وانت مش ناوي تفرحنا بيك ولا اية ؟” و انت في عقلك ترد تقول “لية السيرة الغم دي ما كنا بناكل و حلوين” و ترد بصوت بقي “ربنا يسهل ان شاء الله بس الواحد يشد حيلة في الشغل شويا”, هنا بقي يفوقوا لك وتلاقي كل الترابيزة مركزة معاك و اللي يسئلك علي الشغل و المرتب و انت مرتبط ولا, طبعا كلنا فهمين ان هم مش بيحبو يتطمنوا علينا لله كدة لا كل واحد و وحدة بيرسموا عليك لوحدة قريبتهم و تشوفك مناسب ولا لا.
و في اي حال العازب بيبقي اعد عايز يولع فيهم كلهم و عشان كدة كنت بقولك كل بسرعة في الاول عشان لما يجي الوقت و تتزنق تعرف تقول و تقول شبعت الحمد لله واهو برضو عشان متبقاش اخر واحد قايم لا قايم بشياكة في الاول, طب هوا الواحد مننا بيبقي عايز يولع فيهم ليه؟؟ حاجة من ثلاثة
- يا اصلا هوا عايز يتجوز و مش مقتنع ب اسلوب الناس دي ومش علي استعداد انه يتجوز من علي ترابيزة الاكل اكنه بيشتري طبق كشري
- او برضو عايز يتجوز لكن امكانياتة مش متوفرة فـ السيرة دي بتعصبة و خلاص لانة مش لاقي حل
- او يكون مش عايز يتجوز اصلا الفترة دي و الموضوع من اوله لاخره وجع دماغ و وش علي الفاضي دالوقتي
طبعا في حالة واحدة العازب هيبقي مبسوط فيها بالحوار دة لو العازب اصلا خان مبادئ العزوبية و بيخطط للارتباط بواحدة من الاسرة الكريمة هيبقي سعيد بالحوار دة جدا عشان يقرب من هدفة [الخاين]
وبعد الفطار لو انت حظك سيئ هيستمر الحديث في الموضوع دة شويا لحد ما ينشغلوا في اي موضوع تاني او مسلسل من مسلسلات رمضان اللي انت بتحمد ربنا عليها وعايز تشكر كل المؤلفين اللي عرفوا يبعدوا الصداع عنك
و استمتع بقي بطبق الخشاف او العصير اخيرا 🙂
الصورة من flickr
Tweet
admin, 
GaMaL 1:59 am on September 1, 2011 Permalink |
قوي البوست ده ..
موضوع مش هتفرحنا ده بيحصل معايا كتير أوي أوي ..
محمود 2:04 am on September 1, 2011 Permalink |
اصبح الزواج كالحج لمن استطاع اليه سبيلا :))