اسف يا عم فلانتين

بوست متأخره حبتين بس معلش انتوا عارفين ان كل الناس تقريبا:

يا استقالوا من المجلس الاعلى للعزاب ، يا اما طهقانيين من العيش والعيشه واللي عايشينها

عموما ربنا يصبرنا جميعا

..

المهم .. بمناسبة الفلانتين حبيت اشير معاكم الكملتين دول بقى

آسف ياعم فلانتاين
عدى السنادى كمان وسجلنى غياب
السنجله .. مش مشكله
مش طالبه عك
ولا ناقصه شك وغيره
أو حتى عتاب
منكرش إن انا نفسى حقيقى
أخرج مع بنت وأغيّر جو
وبقولك لو
انا كنت لقيت حد بيفهم
انا كنت ساعتها بقيت جنبه
لكن انا كل مأكون مع حد
يبعد ويقول قال مش ذنبه
وانا قلبى ده مش فندق يعنى
انا أبسط حاجه بتوجعنى
وأهو عادى مجتش على اليوم ده
وانا اصلا عايش من مده
ومسستم نفسى على الوحده
وحياتها عايشها يا عم تمام
لا انا بشحن زى الناس على طول
ولا برغى كتير فـ التليفون
ولا بقعد أسب لفودافون
ولا ضايع وقتى فـ اى كلام
ولا قاعد مجروح مـ الصدمه بسمع
مش زى الافلام
انا زى الفل وإشطه وبيس
مش بفتح شات بالليل عـ الفيس
ولا بسهر أكتب اغنيه
” لا بأس ببعض الحنيه ”
وبعشم نفسى أعيش مع حد
والاقيه بيسسبنى بدون أسباب